Xa vos adianto que o libro de lectura do 3º trimestre é Marxinados, de Pepe Carballude. Se queredes, podedes comezar a lelo xa.
Marxinados é unha historia de persoas que viven, dalgunha maneira, fóra do mundo. Pero que tamén queren cambialo.
Fálanos dunha estrela do baloncesto que un día decide rematar a súa carreira e ir traballar como educador ao internado onde tamén el foi criado. Está alí para botar unha man a nenos e nenas que, coma el, foron excluídos por unha realidade que os puxo fóra: pais e nais atrapados na misera, nas drogas, nos problemas duros do lado máis feo do mundo. Pero tamén está alí chamado por unha historia de amor. Unha novela para pensar nas persoas que non poden facer nada por cambiar as cousas. Pero tamén unha novela para pensar nas persoas que as cambian, para mellor, todos os días.
Tedes a posibilidade de acceder a el de forma gratuíta a través de GaliciaLe, a plataforma de préstamo de obras en formato electrónico das bibliotecas públicas galegas. Esta plataforma abriuse tamén a todas aquelas persoas que non contaban cun carné de biblioteca. Se queredes entrar e non sabedes como, falade comigo.
Tamén podedes mercar o ebook (5,70€) e lelo no móbil, tablet ou ordenador. Galaxia indica as seguintes páxinas para compralo: Casa del Libro, El Corte Inglés.
Comentarios
Publicar un comentario